Boðið var til opinnar kynningar á helstu áherslum rannsóknarverkefnisins Fókus á fjölskyldur í réttlátum umskiptum þann 9. október í nýuppgerðu húsnæði Sögu við Hagatorg. Farið var yfir helstu áherslur og framkvæmd verkefnisins, en í rannsókninni er fléttað saman úrvinnslu á viðtölum við íslenskar fjölskyldur og rannsókn á birtingarmyndum fjölskyldna og umhverfisaðgerða í bókmenntum og kvikmyndum.
Markmið rannsóknarinnar er að kanna hvernig réttlát umskipti geta orðið að veruleika í daglegu lífi fólks og hvernig hugmyndir um fjölskyldu, samfélag og náttúru birtast bæði í menningu og reynslu fólks um land allt. Áhersla er lögð á náið samstarf rannsakenda, fjölskyldna og stefnumótandi aðila og var kynningarfundurinn fyrsti liður í opnu samtali við almenning.
Verkefnisstjórar fóru yfir helstu áherslur, kynntu vefsíðu verkefnisins og svöruðu spurningum, en þau eru Auður Aðalsteinsdóttir, forstöðumaður Rannsóknaseturs HÍ í Þingeyjarsveit, Auður Magndís Auðardóttir, dósent á menntavísindasviði HÍ, og Utsa Mukherjee, dósent í menntavísindum við Brunel háskóla. Angela Snæfellsjökuls Rawlings, nýdoktor í menningarfræðum, og Rannveig Ágústa Guðjónsdóttir, nýdoktor í uppeldis- og menntunarfræði kynntu einnig rannsóknaráætlanir sínar.
